Պացիենտների համար

Մկանային ցավը կարող է ընդգրկել ոչ մեծ հատված կամ` ամբողջ մարմինը: Նրա ինտենսիվությունը կարող է տատանվել թեթևից մինչև տանջող ցավը: Մկանային ցավերի մեծ մասն անհետանում է ինքնուրույն, այնուամենայնիվ, որոշ դեպքերում, դրանք կարող են տևել տարիներ:

Պատճառները

Սահմանափակ ցավերի պատճառներն են. լարվածություն, սթրես, չափազանց մեծ ֆիզիկական ակտիվություն,  թեթև ցավեր:
Ցավեր ամբողջ մարմնում լինում են վարակների, համակարգային հիվանդությունների, դեղերի կողմնակի ազդեցության ժամանակ:

Տարածված պատճառներն են.

• քրոնիկ հոգնածության համախտանիշ,
• ընդմիջվող կաղություն,
• դերմատոմիոզիտ,
• դիստոնիա,
• ֆիբրոմիալգիա,
• հիպոթիրեոզ (վահանաձև գեղձի անբավարարություն),
• գրիպ և այլ վիրուսային հիվանդություններ,
• համակարգային կարմիր գայլախտ,
• Լայմի հիվանդություն,
• մկանային ցնցումներ,
• միոֆասցիալ ցավային համախտանիշ,
• ռևմատիկ պոլիմիալգիա,
• պոլիմիոզիտ (մկանային թուլություն առաջացնող բորբոքային հիվանդություն),
• կրկնվող ծանրաբեռնվածություններով պայմանավորված վնասվածքներ,
• ռևմատոիդ արթրիտ (հոդերի բորբոքային հիվանդություն),
• ձգվածություններ:

Ե՞րբ դիմել բժշկի

Պլանային հանդիպում բժշկի հետ.

• մկանային ցավը, հատկապես ձկնամկաններում, առաջանում է ֆիզիկական ծանրաբեռնվածությունից, և հանգստից հետո անցնում է:
• առկա են վարակի նշաններ. արտահայտված կարմրություն և այտուցվածություն բորբոքված մկանի շրջանում,
• զգացվում է մկանի շարժունակության սահմանափակում:

Անհետաձգելի հանդիպում բժշկի հետ.

Եթե մկաններում ցավն ուղեկցվում է գլխապտույտով, մկանային թուլությամբ, շնչառական խնդիրներով, բարձր ջերմությամբ:

Մկանային ցավը՝ աննշան վնասվածքից, սթրեսից կամ  ֆիզիկական մարզումից, բուժվում է տնային պայմաններում: Ծանր վնասվածքով կամ համակարգային հիվանդությամբ պայմանավորված մկանային ցավը հաճախ հետևանք է լուրջ ախտաբանության և պահանջում է մասնագիտացված բժշկական օգնություն:

Խորհուրդ է տրվում

Ակտիվության ժամանակ ի հայտ եկած մկանային ցավը, սովորաբար, ձգված կամ լարված մկանի մասին է խոսում: Նման դեպքերում խորհուրդ է տրվում հանգիստ, սառույց` մկանի վրա, կոմպրեսիոն կապ և մկանների բարձրացում գլխից վեր (պակասեցնում է ցարգացող այտուցը):